Thu Patna



Tuhun leitung khantohzia manlang mahmah aa khuavakzaha manlang kizopnate kinakzat mahmah hi. Leitung mongkhat pan mongkhat olnotakin kihothei bekhiloin melkimuthei cihzah donga pilna akikhangto hita hi.Tua ahih manin leitung pen khuatakhat (global village) naci ziauta uh hi. Hih banga Pilna khantohna pen Leitung mipilte’n tuihualpi thumin nakhen uh hi. Amasa khantohna Tuihualpi pen Kampau, lai (language) kiciana neihna naci uh hi. Anihna khantohna Tuihualpi pen tua ii Kampaute lai-in gelhthei leh, laikhetna tawhkhenin hawmkhiatna naci leuleu uh hi. Athumna khantohna Tuihualpi pen tuhun hi-in Computer zanga leitung munkhat pan munkhat melkimusa-in kiho, laikikhak, thuthangte tuletu in kizasak, kithei, kimu cih bangin nakhento diudeu uhhi. Adang khatin tuhun pen Pilna khang (Knowledge Age) na cilai uh hi. Tua banga leitung mipilte khenna namthum sungah Ei Zomi Ciimnuai ta Tedim kampaute bang dinmunah ki-om cihpen alung ngaihtuahhuai thu khat ahi hi. Tua banah Zomi Ciimnuai tate’n Pilna bangcih zon ding, leitung pilna amanlangtaka atai koicih delhhuai cihte lungphutna aom bangteng kawlgam, vaigam, saklehkhang, leh tuipigal aom sanggamte tungah anuai abangin kong luikhia hi.

Pilna

Mikangte’n pilna namnihin nakhen uh aa ciimna (wisdom) leh theihna (knowledge) naci uh hi. Ciimna pen pianpihpilna kici thei hi. Hihpen mihing khatciat neihhi aa tua ciimna pen azatna tungtawnin kimukhia theibek hi. Theihna (knowledge) pen sangkah a sinna leh kantelna pan kingah pilna kici hi. Tua in ciimna khangcingsakin mipil hong suah hi. Tua ahih manin asia leh apha, phattuamna leh phattuamlohna khentel theihna pen pilna kici theipah hi.

Pilna kipatnabulpi koipan hi-a, bangzah in thupi, tua-in bangzahtak a, phattuamna hongpia cihte theihmasakloh aphamawh thu ahi hi. Leitunga mipil minthangte laibugelhte enzoleng tampitak omding himahtaleh tuate tunga atuang ii Lai Siangtho sung enlehang kicingpen kha ding hi. Pilna hong kipatkhiatna pen Lai Siangtho in natelgen mahmah hi. Pilna bulpi hong kipatkhiatna pen Pasian hi-in Amah theihtelna leh zahtakna pan kingah ahihzia Paunak 1:7; 9:10; Late 111:10; leh Jakoh 1:5 hihte sungah nagenngiat hi.
Pilna zon ding athupitdan Paunak 2 sungah teltakin honglak hi. Pilna pen Paunak 2:4 sungah “Ngun, ahih keileh a kiseelsum manphazon bangin hahkatin pilna zongin,” 9:11 “Pilna in nakhang hong khan dinga, na nuntaakna hong sausak dinghi,” cingiat ahih manin mihing nuntaakna-ah athupipen in Pilna hi cih hipah hi. American President George W. Bush in “Pilna tawh a nuntaakna akivak mi-in mimanpha mahmah mi hi,” na cilai hi. Tua ahih manin khamlezang, simlemal, leh tuipigal khat aa aom sanggam ulenau, nu leh pa te aw ii sanggam pilna sinte, pilna deihnatakpi tawh azongte gensiasia lozaw aa ii hih theihzahin panpih tumzaw tek ni.
Professor C. Thang Za Tuan in “Pilna pen Pasian kiang pan hi-in sanginn, biakinn ah sinna, zaknate pan kikhuaphawk-beh aa tuhun in tuate pan bek hinawnloin nasepna pan, mite tawh kikholhna pan, innkuansung pan, mipite thu kizakna ahi tadensa, radio, TVpan, Internet leh Cybercafe te pan, leh mundangdang pan kingah theita hi”ci hi. Tuabang hina pi-in ii Tuunnu Zogam Ciimnaui khuamun omna Tedimgam ah hibangte sehsawmsuah sehkhat in a zangthei tamcih dinmun ah ki-om laimawk hi. Pilna bangzah in thupi cihpen mundang gamdang aa atung sanggam nu leh pa, ulenau te’n telngel ding nahih manun ii Thangho leh Liando tangthu lungngaihtuahna ii neih ding thupi kasa hi.

Abeisa Hun Zomite Leh Pilna

Zogam ah pilna laisin pen Kayin Siate makaihna tawh Tedim, Khuasak, Tonzang, Hakha leh Thantlang te ah kawllai sinna 1901 kumin na kipankhia uh hi. Tua pen ei Zomite adingin sanglaipilna sin kipatcilna (formal Schooling) hipah hi. Kuamah sangkah nuam ki-omlo ahih manin akipatcillamin sangkah dingte sumtawh khasimin kiguailiang aa sang akah uh ahi hi. Japan galma ciangciang sangkah nuam tamnailo aa kumpi ki-ukna amapai theihna’ng in amau utleh utloh thutawh kisailo in sangkikahsak a, kumpi’n khakhat Stipend leh a nekledawn ding, akisam van leh nate vanpih in sangkah uh hi. Pawlkhat sangkah nuam napi’n kumpite leh hausa-upate kham hituanlo in, nute pate in sangkah laisim pen zinghuan nitakhuan in kizang theilo ding ahih manin lokuansak zaw uh ciliang hi.

Tuhun in zong tuamah tawh kibang laimai hi. Banghanghiam cihleh sangkah ding sangin lokhawh hinawnloin gamdang ah paisak in sumzon ding bekbek kithupisak hi. Tua in Zomi Ciimnuai tate mailam makai ding tampi hong vatmai sak hi. Pilna zonhun om aa sumzon hunzong omhi cileng kikhiallo khangel ding hi. Pilna zonna ding sum kisam pen aman mahmah hi. Tua bang aci nu leh pa sanggam ulenau tezong khialkhin tuanlonapi’n pilna zonmasak ding hanthot aa ahithei zahin panpih ding thupizaw hi.
Sangkah ding lawpna leh uttawmna pen hun kikhelna tawh kizui-in khangto aa leitung galpikhatna (1914-1918) masang in galpikhit Zomi Ciimnuai ta Tedim kampau Piantit (France) kuante hong tunkikkhitzawh ciangin Pilnadeihna hong khangsan pan hi. Japante hong uk (1943-1944) sungin Mikang kumpite galvanleng in bomb khiat ding laupipi mahin Thuklai, Mualbem, Saizang khuate akipan khuapawlkhatte ah sangkah mah om veve ci uh hi. Japangal venkhit lian, 1945 kum kipatin kuama sawl, hanthotsa cihbang kulnawnloin sangkah ding nalawpta-uh ahih manin mipil milian tampi na omtopah uh hi. Tua bang ahih sam hangin numeite bel sangkah ding kihah sawlcihbel omnailo cita leuleu uh hi.
Kawlgam suahtakkhit (1947-1985) sungin sangkah abeisa sang kitamzawdeuh naci uh hi. Khuagamla pipi Haiciin pekpan leh Tedimkiim tai 7,8 gamlatna panin pilna zong uh hi. Hostel ah ompah uh aa amau anguaiciatmah tawh amau huantawm uh ci hi. Mei-inn (lantern) zong neilo uh ahih manun meikhuatvakin nihlethum bang ki-umlinglengin agingloin laisimin hanciam uh cilai hi. Tuaban ah zanpuanlum zong neiloin Japan gallai a sakolpuan/kambal (comforter) te mulcilh-sapipi-in nihlethum bang lumkhawm uhci tanghial hi. Phalbi zanngial bang akisukkhak natebek luma, kiheiheileng khua hong vak theisam nacibek uha pilna zongci uh hi. Tuhun inzong ii gamsung nuntaak-khuasak ollohnaziak hang mahzonglah hikawmin hihmah abang pen Zomi Ciimnuaita Tedimmite sungah za-ah sawmsagih (70%) bang ki-omlai dinmun ahi hi. Tua bangin haksapipi mah aa pilna azon manun mipil kiciaptehna Luyechun thuapnih, thuapthum ngahtopah uh aa tuhun in ii zahtak leh muanlesuan makaite hong suakpah uh hi.

Tuhun Zomite Leh Pilna Tawh Nuntakzia

Tuhun in ahih leh pilna thupi kisa, kideih mahmah ta hi. Ahizongin pilna zonna ding nuntaak-khuasak hamsatnate hangin lungnuamtakin zongtheilo tampi ki-om hi. Tuaban ah sakah khangah, tuipigal ah kizinin sum kizongzaw hi. William Shakespeare in “If money goes before, all ways lie open, “dangka masuan peuhleng makhempeuh vangkhin hi” acih pen kisangtheizaw hong suakmawk hi. Banghanghiam cihleh hihpen ii gamsung nuntaakna ii huzap haksatna tampite hang zong ahi hi. Sangsum dontam banah sangsiate’n khasumkhamlo ahih manin tuition, border hong uh aa tua munah akahzote bekin laithei zawdeuh uh hi. Tuate huhau in pilna sangin sumdeihna hong khangzawsak mawk hi. Napoleon Bonaparte in “The word ‘impossible’ comes from the fools mouth,” ‘hizokei’ cihkam malpen mihaite kampan hong paikhia hi, naci hi. Hih kammal pen ei Zomi Ciimnuaita Tedim kampaute’n nuntakpihhuai mahmah hi. I biak Sianmang in zong misila ding aa ahong siam hituanlo hihang. Hanciam peuhleng milian, mipilleh kumpi suakthei ding a zong hongsiam hi.

Pilna kisinna kicing neihtheihlohna hangin ii gam, ii leitang, ii minam zong ki-it zolo suak hi. Ei Zomi anei zawdeuhte enlengzong pilna a neihloh manin a hauhpualahin ama nunsung nangawn akhomzo ii tamkeipah hi. Minamdang mihaute enleng amau apil manun amauneihsa atu ata te’n gaizolo uh hi. Tua ahih manin pilna mah thupisak masak ding akisam nahi gige hi.
Pilna neihlohna ii a hoihloh dan pen kawlte’n zong paunak in nanei uh aa hih bangin na ci uh hi: “Pilna neilo misila,” cihnopna-ah pilna ii neihkeileh midangte ii sila suakding cihthu hong telsak hi. Melhoih ningtui kidawn theilo cihmah bangin kawlte’n zong” a paak ahoih hangin namtuinaneilo paak tawh kibang na ci uhhi.
Zomi Ciimnuai tate Mailam Ading Vaipuak
Pilna tawh ii nuntak khuasak theihna ding pen leitung nuntaaksung athupipen ahihna Lai Siangtho sungah teltak in hong gen hi. A diakdiakin Paunak sungah kiciantak kimuthei hi. Tua ahih manin Zomi Ciimnuai khua paakbang apalluunna ding pen Zo vontawi Nu leh Pa, Ulenau, Simlemaal, Kawlgam, Vaigam leh Tuipi galkhat aa a-omte vaipuak ahi hi. Banghanghiam cihleh mipilte’n agam, aminam akhantoh theihna dingin ama pianna gam, akhuapuah in amipih, asapihte nuntaakna akilapsang theihna ding anuntakna pia in sem hi cihpen Mahadma Gandhi, Boyoke Aungsan, leh Marthin Luther King te tung pan kitelmahmah hi.

Mailam ah Zomi Ciimnuai tate’n ii Zogam paakbang hongpaallun semsemna dingin sepding vaipuak namguk konglakkhia hi.Tuate anuai aa bang ahi hi.
(1) Pilna sinnuamnapi bangmahneilo, pilnazonna ding avaihawmpih ding leh apanpih ding a omlote khuangaih tuahna in hostel (border) pikhatlamin laihilh ding Siapa leh Sianu cialsakngiat aa Pasianthu leh Leitungpilna tawh akhanna dingun pantah ding,
(2) Agape Zatopikhat hongin tualai-ah Zomi Ciimnuai vontawi lia leh taang Siavuan sinna akicingneite cialding leh Zatui leh zaha atawm theipenpen in zuakding,
(3) Mipikhua muhna atangzaina ding, minam itna akhanzawkna ding, Pasianthu leh leitungthu ah makaipicing neihzawhna ding leh micitak gammakai hong omtheihna dingin Laibusaal hong ding (Laibusaal ah laibu akicingtak aa koihding zong kisam mahmah hi.),
(4) Ngeinate kepcingna ding Museum neih aa tua lai-ah ii ngeina vante koihding leh khuahun khantohna tawh kizui-in ngeinate puahtheihna ding zong tua lai mahah kipawlna zumtawh neikhawm ding, leh
(6) Zogam Ciimnuai khua mahmah ah leitung mongkhat pan mongkhat meltawh, laitawh kizopna aa akizang computer, internet cihte nasiatak akizattheihna ding cihte ahi hi.
A tung aa thunam gukteng pen ii Tuunnu Zogam Ciimnuai khuapi pan patding leh zatding tummasa dingin Pilna leh Siamna anei, asin, nuntaakna khuasak kivakna ding azong a-om Simlemal, Saklekhang, Kawlgam, Vaigam leh Tuipigalkhat aa a-omte khempeuh kong theisak hi. I paunak ah “Nupa kilungtuak khuakhat in zolo, khuakhat kilungtuak khuakua in zolo,” cih ii neihmah bangin tua bang aa kilunghualin semkhawmleng Zomi Ciimnuai tate paakbang paallun bektham-loin midang namdangte’n hong enpipan ding hi. A tung thunamgukteng pen Pasianthu leh leitungthu ahuamkimpen leh nuntakkhuasakna ading athupipen ahi hi. Tua ahih manin nang leh kei-in malobang panni, labek-in ii Zagam itna sakei ni, athubek-in lelkei ni!

Thu Khupna

Tuhun ciangin leitungpilna khantohna tuihualpi thumna-ah aomlaitak hun hi. Ahizong ei Zomi Ciimnuaita Tedimmite leitung mipilte ciaptehna khantohna Tuihualpikhatna leh nihna kikalah ki-omlai hi. Leitungah mite internet tawh kizomziahziahta aa en pilna ii neihloh manin misila peuhin ki-om aa haksatna tampitak kithuakkha hi. Pilna zonding thupisalo hiloin sumlepaai haksat manin Diaspora Jews te bangin munkipneilo, gamleh lei hoihneilo bang aa kham leh zangah kithehin lungsim tuibang-gawmding haksata hi. Hihthu lungngaikawmin ii Zogam Ciimnuai Tedim kampau minam makai dingin ii mipih ii sapih leitungpilna, leh biaknapilna sinte minam dangte lakah gualhuai-in lailungnuamtak asin theihna ding vaipuak lianpi-in ii ngaihsuttek ding khuangaihhuaita kasa mahmah hi. Kawlgam, Khamtung gamah lungdamna thugen aa hong pai Pasian nasemte mission nasep mabang azom eite’n ii minam Pasianthu leh leitungthu ah kilbang akhan na’ng nakpitakin sepsankul mahmah hilo ahi hiam?

Ekkak Laibu:
Prof. C. Thang Za Tuan, “Tedim BEHS No (1) Sangpi Golden Jubilee Magazine.”
Prof. C. Thang Za Tuan, “Zolus Magazine No (10)”
Rev. Job Nang Khaw Thawng, “Na Khangno Na Kuamah Kisimmawh Sakken.”

Laksawna: http://www.laibusaal.com/2010/07/tuhun-zomite-leh-pilna-agelh-gin-khan.html

Source : Ciimnuai Khuavak Vol II

Facebook Comments