New Zogam (Bowling Green, Kentucky)



New Zogam (Bowling Green, Kentucky) Photo TZN Thang Khawm Pau Zomi
New Zogam (Bowling Green, Kentucky) Photo TZN Thang Khawm Pau Zomi

Mungtuamtuam a om it leh ngaih Zomi akua mapeuh abeisa tuma kum 3 laai a itaangko khiat ahi Zogam Thak saatding cih isuunmang kongtaangko khiat ngeithu uh tawh kisai maban pawlkhat kongtaangko beh nuam hi.

Itaang ko khiat a kipan sak le khang pan Zomi te ongkituah pah ziahziah in tu in Zosuan limlim mimal 800-1,000 kikaal kiphato ta hi. Zosuan sung a kipawlna ahi Zomi Innkuan leh UZO kipawlna te zong kiptak in omkhin a, Biakna lam ahihleh Pawlpi alian-3 leh 4 bang ki omta hi. Kuasung minam kipawlna tuamtuam te ah zong Zomi te minamkhat kipawlna khat in ongkiciamteh in tualsuak mi te mahtawh zingvaai kihawmkhawm theita hi. Tu ta ongbat tohtoh leh tuzawh kum-20 sung in mun le mual te kineizo tading a kalsuanzia nuam mahmah tading in lam etna omhi.

Tuni dongciang mah Asak akhang pan mi ongkituahziahziah a anini kipunghenhen bek hi. Pasian in Zomi te kilomnading mun a onggeelsak mah in om hiding hiven, Nidang in Mikaangpau theilo te aluut theilohna nasepna hoih naikhat $14,15 sanna munte ah tu in Mangpau atheih kei leh zong Pauthei khattawh ongpai henla, Pauthei ongzui theiding aom kei leh zong ko huhnung ci in naseem deihten ongsam ziahziah ta mawk uhhi. Topa minthang ta hen!

Hih Zogam thak ahi bowling green, Khua peen Zomi te bek hilo in gammi mikangte mahmah in zong tuma kum-10 laaipek pan nabeel ziahziah uha, milip akhanmahmahna, akibelh mahmahna khuakhat in kiciamteh hi. Mivom tawm mahmah a, Guta saalvaak kuamah omlo ahihman in inn tawhkalh kullo, in daai mahmah hi. Mikang ten agenna uh-ah himun akibelhna peen Mihing te kisapna te kim mahmah a, khualaai in naseptam naitha tam in nuntaak khuasakman ( Living cost) tawmbei mahmah hi ci in gen uhhi.

Tua ahihman in na omna khua ah nasep kician neilo, naitha tawmlua, nasep tawl kisa, pau le ham theihloh man in hamsatna thuakkha in na om aleh, aman laang in ongkituah in zekaai naailo hiteh, Zomi Agape Pawlpi in naakpi tak in ongmuak nuam a adangpawlpi ten zong ongmuak nuam uhhi. Hizahta a kibeel Zogam khuathak I thu theihhuai pawlkhat anuai ah kongpulaak khia nuam hi.

1. 1812 kum in kisaat in Khua ci in ciaptehna ngah hi

2. Mimal- 60,600 Pha in 46,500 Mikaang hi in adangte kihel nawi hi

3. Khuapi agolna peen 38.5 Square Mile zai hi

4. Alumna peen 59F hi a Guahzu zeuhzeuh in Snow-Vuuk peen Letmat 3 sang sahzaw ngeilo hi

5. Lampi Gol nih Khuasung ah om a, Pi 6,500 leh 4,000 sau hi.

6. Radio Station 14 om hi

7. TV Station 2 om hi.

8. Public School 14,000+

9. University – 1

10. Community College-3

11. Independent School- 4

12. Meiphelh zum mun-7 ah om in meiphelh naseem 117 pha uhhi

13. Palik zum khat om in Palik 147 om hi

14. Gualnopna leh kimawlna mun 42 om hi

15. Golf saatna mun-5 om hi

16. Lai etna phual mu-5 om hi

17. Mipi etnop huai Museum- 5 om hi

18. Pawlpi 36 om in Biak Inn 146 om hi

19. Tui Gallon 30million nisim kizang den hi

20. Nisim Mei-Electric-500,000kW thahat kizang hi.

21. Lamkabom mei 102 om hi

22. Mawtaw hawlte lamlahna lim mun-9,890 om hi

23. Tax peen 6% kipia kha hi.

24. Living cost peen US gambup ciapteh nasang in 16.5% tawmzaw hi

25. Nasemneilo unemployment rate peen 4.3% hi

26. Inn leiding te sang in Inn zuaknuma kitam zaw hi.

27. Thong Inn 2 om in Zato lian-2 om hi.

28. Nasep theihna mun-150 vaal om hi

Zogam thak in nangbek haaibang ongngak hi.

Lungdam

Thang Khawm Pau ZOMi
Bowling Green , Kentucky
USA

Facebook Comments