Zomi Innkuan USA
Executive Committee

Thupulakna (Press Release)
June 4, 2016

Zomi Khawmpi USA 2016

Ahong tung ding July 4th Holiday Week-end (June 30 ~ July 2, 2016) ciangin, Zomi Innkuan USA kipawlna vaihawmna leh Zomi Innkuan Tennessee kipawlna innteekna tawh, Tennessee Gamkee, Nashville khuapi ah akibawl ding Zomi Khawmpi USA 2016 kiginkholhnate limtak in kikalsuan thei hi.

Zomi Khawmpi USA 2016 pawipi sung ah anuai a pawi tuamtuamte bawl dingin kivaihawm hi.
1. ZIUSA Cup Soccer Tournament
2. Zomi Idol USA Competition
3. Miss Zomi USA Contest & Zomi Cultural Show
4. Zomi Concert USA
5. Zomi Youth & Student Forum
6. Zomi Forum
7. ZIUSA Annual Meeting

Pawi tuamtuamte vaihawmna ah madawk in ma apang dingin Sub-Committee tuamtuam kiseh a, akisam bangin a hun zui in pawivai tawh kisai thu pulakna hong bawlzel ding uhhi.

Zomi Khawmpi USA 2016 hun sung a kibawl ding pawi tuamtuamte vaihawmna pen anuai a bang hi.
· ZIUSA Cup Soccer Tournament bawling kidemna ah US gambup mun tuamtuam pan Zomi Innkuan kipawlna min tawh teeltuam Team (12) hong kidem ding hi.
· Zomi Idol USA lasak kidemna ah US gambup mun tuamtuam pan lasiam Zomi mimal (30) hong kuan in, lasak hong kidem ding uhhi.
· Miss Zomi USA meelhoih kiteelna ah US gambup mun tuamtuam meelhoih Zomi Liapaal mimal (20) val hong kikaikhawm in mipi mai ah kiteelna kibawl ding hi.
· Zomi Concert USA pawipi ah US gam sung a om a minthang Zomi lasiamte tawh la hong sakhawm dingin Kawl gam pan lasiam khat, tumgin tumsiam khat leh India gam pan lasiam khat kisam hi.
· Zomi Youth & Student Forum sung a thugenna leh holimna hunte sung ah ZIUSA kipawlna Khangno Makaite tawh ahong kihel dingin US gam sung a aminthang University sangpite ah akah Zomi mipilte, Kawl gam pan UN Zumpi a nasem uliante kicial hi.
· Zomi Forum sung ah gam leh minam thu holimna limci takin kibawl ding a, a Thulu dingin “Zomi Identity & Zomi Movement” kikipsak hi. Zomi Forum sung ah a Thulu tawh kisai thusung dingin ZCD Party, ZNC Party, ZRO Pawlpi, GZA Kipawlna, LZI Kipawlna, ZYA Kipawlna leh ZIUSA Kipawlna cihte panin Makaipi khatta kicial hi. Holimna sung a Thudotpi dingin Gam leh Minam vai tawh kisai Zomi mipil misiamte zong kicialbeh hi. Gam tuamtuam pan in Khawmpi hong siim Zomi kipawlna Makaite leh Zomi Forum sung ah kihel mipi sung pan mipil misiam, makai uliante inzong Thulu tawh kituak in thu kum thei ding hi.
· ZIUSA Kipawlna Kumcin Khawmpi Thukikupna limtak in kibawl ding a, Thukikupna akah dingin US gam sung a om Zomi Innkuan kipawlna makai panmunlen khempeuh leh Khawmpi asiim mipi sung pan a lunglut khempeuh kicial hi. Thukikupna sung ah abeisa hun sung a ZIUSA Kipawlna maban kalsuannate pulakna, etkikna leh mailam kalsuan ding mabante kikupna kinei ding hi.

Khawmpi hun sung a kibawl ding pawi tuamtuamte hun-geelna pen hih Thupulakna tawh akithuap Tentative Events Schedule bangin kivaihawm a, a kisapna bangin kipuahpha thei ding hi.

Khawmpi Hon’ Pawi (Official Opening Ceremony) pen June 30, 2016 (Thursday) ni Nitak in kibawl ding hi. Khawmpi Hon’ Pawipi sung ah Minam Thungetna (National Prayer) hun khat kila ding hi.

Hun kigakna hangin ZIUSA Cup Soccer Tournament pen June 30, 2016 ni Sunkim a kipan in Group kimawlnate kipan ding a, Kimawlna Honpawi pen July 1, 2016 zingsang in kibawl ding hi.

Zinvai tawh kisai in innteek Zomi Innkuan Tennessee kipawlna in thu hong taangko ding hi.
Nashville Music City ah kimu ni ei.

Executive Committee
Zomi Innkuan USA

Tang’in,

GSKhup
General Secretary
Zomi Innkuan USA

Tulsa, Oklhaoma, USA
June 4, 2016

Facebook Comments