Zomi Cup 2016

Feb 8, 2016 niin Zomi Cup 2016 Zomi tampi tenna gam leh khuapi Kuala Lumpur, Malaysia ah nasia takin kipan hi. Team 24 kihel in, Zogam khua tamzaw pan bawhlung siamte kidem uh hi. Team 25na leh 26na dingin Zomi Innkuan Singapore Team leh ZAM Makai Team zong khatvei kisui uh hi. Zomi Cup 2016 Honna leh Thapiakna thupi takin hong neihsak Dr. J.M. Ngul Khan Pau, International Consultant, DAI hi a, amah a zui thei a zi Sianu Lucy Dimnu zong hong kihel thei hi.

Bawhlung siam tangvalte a kigual in galkap lam ding mahmah bangin hong pai diamdiam uh a, a makai uh amau khua ciat pan Zolia melhoih sitset in Khua Min leh Khua Puankhai tawi in hong makaih uh hi. Makaite a kawi leh a zuite zong kawipai in Zomi Cup kikoihna dawhsang mai ah a khua khua in hong kigual dimdem uh hi. Vaphual singkung tuang mahmah bangin pak ziziai a, galkap lam ding mahmah bangin kigual dimdiam uh hi. Mit nei khempeuh in mu leh hoihsa ding hi.

Bawhlung sui ding Zotang te kigualhna ah khua min lak Zoliate hong din sitset pen nak etlawm in angtanhuai mahmah hi. Khatvei tangval ciatciat tua ni a kihelkha te ka eng mahmah hi!

Makaite in Zomi Cup 2015 a Champion tung panin cup sankikna hong nei uh a, dawhsang tungah koih in mipi in khutbeng ziahziah hi. Zomi Association of Malaysia makaipi Pu Hau Suan Khai in mipi khempeuh muakna leh Zinmangte muakna nei in, Zomi Cup 2016 kihel ding khempeuh siangtho taka kumlui mah banga etlawm a kimawl siam dingin deihsakna leh hanthotna gen hi.

Zinmang Dr. JM Ngul Khan Pau in mihing nuntakna pen kimawlna tawh a kibang ahihna a gen ban ah khangno kimawl ding khempeuh itna lungsim nei a, gualzawh leh guallelh zong a pua siam ding, a thuak siam ding leh khialhna a om leh zong telsiam a maisak dingin bawhlung siamte hanthawn hi. Hanciam dingin leh thakhiam lo napi hanciam luat mana kam paukhial, gamtang khiallo dingin khangno khempeuh deihsakna pulak hi. Zomi makaite hanciamna leh panlakna thupisa ahih na gen in kum tampi Zomi Cup a kizoptoh ding deihsakna pulak hi. Nuamtak, siangtho tak, thupi taka hih kidemna hun a zo dingin deihsakna a gen khit ciangin Pasian kiangah lungdamkohna leh thungetna tawh Zomi Cup 2016 hong hi.

Zomi Innkuan Singapore Team leh ZAM Makaite Team kisui masa pah a, ZIS President leh ZAM President te gel Captain hipah uh hi. ZIS President striker kah a, ZAM President goalkeeper sem hi. A kipat zawh minute 10 ciangin ZIS President in goal khat khum a, a tawpna ah ZIS in ZAM 3-2 in zo hi. Zomi khangnote bek hilo in Zomi makaite zong na siam lai veve mawk uh hiding hi a gei a mipite in khut na beng ziahziah den uh hi. A khanlai un nasia ngel ding uh hi!

Malaysia a om Zomi te leh Singapore pan pai Zomi tukpeng suite khit ciangin a khua khua a kidemna kipan pah a, Anlangh leh Mualpi kisui bang ka etkhak lak ah a nasia mahmah himawk hi. Siam uh, hat uh, ngaihsun man uh, nungakte lah a aw uh ngaih… Zotang tampi in goal khum bek hilo itna zong tampi Zolia te tung pan luangkhia ziahziah in pumtuam dingin ka lamen hi. Zomi khangno hibang hun nuam a ciamkha, a kihelkha, a om khate hampha leh angtang sa ngaungau ing.

A kisui peuhmah muhnop semsem a, tui dawn ding nangawn in kidingkhia ngam nawnlo in Tualpi nih ah kisui bawhlung siamte ki mitsuan ngiungeu tek hi. Tualpi nawl a singkungpi dawnah Tawlawk hong khuang ngeungeu a, ka khuadaktoh leh Ni na kai pianta a, nitak anhuan hun na hita ahih manin ko zong Singapore ah ciahkik dingin ka Bus Station omna lam uh ka zuatsan ta uh hi. Nitum dong ki en man hizen leh maw ka cici hi (tuni dong).

Lenlai hun nuamte lah sulhei kik nawnlo ding a maw… paallai!

Hau Za Cin
Phuitong Liim
www.hauzacin.blogspot.com

Facebook Comments