Joye Meyer in a hauhzia gen

photo
Lifestyles of the Rich and Famous Laodiceans – Joyce Meyer

Kei ka min pen Joyce Meyer hi. A hau mahmah khat leh Pasian thugensiam minthang mahmah khat ka hihman in St. Louis Post Dispatch in “From Fenton to Fortune in the name of God” cih thulu tawh keima tangthu kim takin gelh uh a, hawmkhia uh hi. Ka hauhzia a thei nuam tek dingin hong lamen ka hihman in dam takin hong gen hiat-hiat ding hi’ng.

A masa pen in ka cih bangbang hong nial ngei het lo pasal thumang mahmah khat tawh ka kiteeng kha hi. Ama min pen Dave ahihi. Laisiangtho in “Numei te lutang in Pasal ahihi” ci mah taleh ka pasal Dave in kei thu hong nial ngei ngiat lo hi. Ama tungah ka lungkim ahihman in ama zat dingin Mercedez Benz S55 AMG khat $100,000 man ka leisak hi. Hau lua ka hihman in mi tampi in hong gensia uh a “Zeisu in sum leh pai leitungah khol kei in ci hi lo hiam?” hong ci thei zelzel uh hi. Hi mah hi, ahizongin kei leh tua Zeisu kammal pen kisai kilkel nawn lo hi. Bang hang hiam cileh ken tua teng ka paisan khin a, tu in ka thaman a sang ka hi ta hi. Leitung  hauhna leh Pasian hong itna a ngah khawm thei ta ka hihi. Hau ka hihman in Africa gam ah kei ngiat va paiin mizawngte khatveivei an ka vaak thei zel hi. Tua mizawng an ka vaak teng maan zaih in ka kizoppih mihaute kiangah ka lak hi. Sum tampi ka ngah lawh pah hi. Hih mizawngte leh naupang gilkialte hang  hikei leh ka nupa un kum simin sum $ 1.3 million ka ngah zo kei ding uh hi.

Sum tuazah kumsim in ka ngah theihna uh bang hang hiam cih hong gen ding hi’ng.  Keima min tawh“Joyce Meyer Ministry” cih khat ka bawl uh a, tua sungah Board of Directors om uh hi. Tua teng pen midang kuamah om lo in  keimah leh ka nauhuai teng banah ka lawm muan mahmah teng hipah uh hi. Ko tungah thunei kuamah om lo ahihman in sum-leh-pai khempeuh koteng zeek hipah lel hi. Hih board members teng in deihsak tuam leh thumaan lopi in nasem lo ding hi cih pen ka tel mahmah hi. Bang hang hiam cileh board members ahi Roxanne leh Paul Schermann te tenna ding innpi $ 334,000 man khat ka leisak hi. Tua lo board members dang teng khemepuh zong a inn saap man teng uh keiman ka piaksak den hi. Ka hauhna tawh kizuiin mi huh thei ka hihman in ka lungnuam a, adiak in kei hong huh theite huhsawn thei ka hihman in ka lungkimna lian mahmah hi.

Kei hauh zah in hau in kei minthan zah in na minthang leh nang zong na lungmuang thei lo ding hi. Tua ahihman in kei leh ka neih ka lam teng a cing ding Security ka neih loh hong kiphamawh ta hi. Laisiangtho in “Ka kidalna in Pasian ahihi” cimah taleh lungmuang zo tak lo ka hihman in ka omna ding inn ka lei ciangin a innpi bek lei lo in a huang teng khempeuh zong ka lei pah hi. Kei omna ding innpi (Mansion) $ 2 million man ka lei pah giap a, ka huang zaina pen 10,000 Square foot ahihi. Ka innpi laizang ah Moto buuk (Garage) 8 om hi. Tua teng banah ka tate omna ding inn zong ka leisak tek hi. Den in Security ka kisap vai kong gen pen a himah ahihi. Ka Security teng thau tawi sak tek ka hihman in lungsim hoihlopi tawh ka huang sung nong lut loh ding thupi hi. Security bupa tenna dingin ka innpi geiah  inn khat $ 145,000 man ka leisak hi. Nai 24 sung tawntung a kisap hunhun in ka sam thei pah hi.

Thusim khat hong gen ning maw. Ka hauhna kumpi in hong kansak theih lohna dingin ka ministry pen biakinn vai hi cizaiu ka hihman in IRS Exemption ka ngah thei pah hi. Biakinn ka cih sam hangin biakinn taktak ka nei kei uh a, ka office gei a inndei awng khat pen Chapel in ka zang ziau uh hi. Kei sep taktak pen leitung mun tuamtuam ah khualzin in mipi lawp theihna ding leh thangah theihtheihna ding thu gen in Seminars ka bawl kawikawi hi. Tua banga khualzin den ka hihman in mipi tuanna vanlengte zat ding hong lem den thei nawn lo hi. A sawt lo in ka kizoppihte hong sum khak tawh kei aituam zat ding vanleng khat $ 10 million man ka lei leuleu hi. Tua ka vanleng pen Canadier CL-600 Challenger ahihi. Tam man mahmah ahihman in mihau minthangte’n zong lei zo kim lo uh hi. Hih vanleng pen Pasian ngiat in vanlengtual ah sawtpipi vanleng na ngak niloh sangin nang aituam zat ding vanleng khat lei in hong cihman in a lei bek ka hihi. Vanleng nei kei leng ka tawlngakna dinga ka lei Ozark tuipi geia innpi $ 500,000 man sungah nuam takin sawtpi ka tawlnga man kei dinga, $ 105,000 tawh ka lei ka gunkuang Crownline Boat tung tuangin lawmte tawh ka vaak khawm man kei ding hi.

Tua teng khempeuh banah kei pen laitaan sang zong anei lo khat ka hihhangin Ka Ministry panin kum sim $100 million a ngahden khat hisam ka hihman in keimah banga Pasian nasem mi minthang leh mihaute tawh ka kikholh hong kul den sawnsawn hi. Tua pen thubaih hi peuhmah lo hi. Tua hang mahin ka Joyce Meyer Ministry Center lamna ding leitang awng khat a zaina 148,000 Square Foot ka lei leuleu a, tua munah inn golpi khat ka lam hi. Ka inn hong lamsak dingin innlam siam minthang pente ahi Messner Construction te ka cial pah hi.Hih ka innthak sung aka van koihte hibang dan in hong gen ziau ning; Sabuai khat (Malachite table)$30,000 man,marble suang tawh akibawl dailenna khat $23,000 man,Dresden paakbel kop khat $19,000 man, French te paakbel 6 $18,500 man, leh Conference hall a zat ding sabuaipi khat leh tutna 18 pen $49,000 man ka lei hi. Hi bang teng tawh ka innthak zem ka hihman in baih het lo hi.  Zum thak sunga vanzat ding tutna leh sabuai a kipan a vek in ka leina in $5,7 million bei ta zen hi. Mi atamzaw in ka sabuai khat leina zah sum pen kum khat in zong na thalawh zo kei ding uh hi. Ahizongin Pasian in “Pia un, na ngahkik ding uh hi” ci ahihman in na sum neihte uh hong khak khak lai un, tua hileh nikhat ni ciangin no zong Pasian in na innsung  vuah sabuai hoih khat hong pia kha mai ding hi.

Ka khawlna dingin hih hong gen ning,  ka kizoppih lawmte aw Joyce Meyer Ministries tungtawn a Pasian na piak uh sumte pen a hithei banga ka zat hong kul hi. Tulian in leitungbup ah mihau 100,00 tawh ka kizom a, amau teng in khasim in sum hong pia den uh hi. Maikum ciangin hong piak zah uh a zahnih in khangsak lai ding cihpen lametna lianpi Pasian in hong pia hi. Tua akhangsak dingte lakah no zong na kihel theihna dingin thu na ngenngen unla, kei zong Pasian huhna leh nomau nong sumpiakte uh tawh a sawt lo in ka zatgaih zawh loh ding sum tampi nei ning cih pen ka sunmang hi. Tua ka sunmang a lawhcing sak ding no teng mah na hi uh a, kei sanga lungkimzaw ding zong no teng mah na hi uh hi.

Joyce Meyer

Zolai tawh a letkhia:
Lam Thang
Francis Quavadis

Facebook Comments